تحل عينيك مع السابعة صباحا على ايقاع المنبه ديال تلفونك لكيصوني من السادسة صباحا.. تغسل وجهك بالما بارد وتشوف وجهك خاسر وعينيك مبزليين، تحلق اللحية شوية لكتحيدها ديما كل صباح.
تفطر خمسة ديال دقائق, باش تلبس البدلة و تقاد الكرفاطة فعشرين دقيقة.. تخرج ونتا زربان من الدار, واخا خدام و المعاناة و الكرافاطة و ماكيناش الطوموبيل.. تبقا واقف واقف واقف.. ويحرقك الطوبيس, كتشوف فالساعة كيتبدلو الملامح ديال وجهك..
كتفكر فالمصروف والقهوة ديال غدا.. وكتوقف طاكسي حمر. ولكن ماغاديش فديك الجهة لغادي ليها, كتزاحم فطاكسي بيض, هادشي كامل جنب البلاكة ديال الطوبيس...
كتوصل الخدمة معطل بعشرة ديال
الدقائق.. مع الدخلة كدير صباعك فعنقك على أساس أنك جاي زربان و باغي تخدم وعطلوك,
مكاتقيسش الكرافاطة حيت أتخسر ليك ونتا من نهار شريتها مفتحتيها..
كدخل المكتب كتلقا نص متر ديال الملفات والأوراق خاصهم اتخدموا.. كتزيد تخصر الملامح ديال وجهك وكيبقا الواقع هو الواقع.
كتغرق فالوراق والتلفونات.. كلشي
بغا خدمتو فوقت واحد, ولكن كتسبق ديال الشاف هيا الأولى, وكاتسنا التلفون ديالو
باش تمشي توصلها لو بسرعة "خَفنْ زُربنْ".. عاد كتشوف الخدمة ديال
المكرفطيين صحابك فالعمل فقط.. لكضحك معاهم ديك الضحكة الصفرا الباهتة فالكحل ملي
كدور وجهك..
مرة مرة كتشوف الوقت فالساعة.. كتحس بيه حلزون مكيف كتامية وهاز فكرون فظهرو, حاجة عادية حيت درتي فيه راسك..
كتبقا عشرة ديال الدقائق باش تخرج تغدا, وتكمي جوج "وينستون" وتشرب "نواار".. كتفرح ملي كتفكر فهادشي.. كتخرج واحد البسمة ديال المسيح, كيجيك تلفون لكنتي كتسنا من عند الشاف, كيرجعوا الملامح كيف كانوا مع السابعة و خمسة دقائق.
كتغتاصب فنصف ساعة ديال الراحة ديالك و كترجع بسرعة تاني تكمل مابديتي.. بطبيعة الحال الشاف ديالك.. وقتك ديالوا.. باش تربح الرضى والابتسامة و ديك صباح الخير و متبقاش تعطل بزاف واخا ؟
كتخرج من الخدمة.. كدير صباعك فعنقك باش تنفس الكرافاطة شوية.. كتبقا تسنا الطوبيس مع واحد الطبقة مختلطة ديال الناس.. كيوقف الطوبيس كتبدا غزوة بدر, كطلع كتلقا عيد الحب, كتمارسوا شوية بزز عليك.. وحاضي جنابك من ابي لهب...
كتوصل الدار منهمك.. سخفان حسن بهاد المصطلح, كتحيد الكرافاطة هيا الأولى والبدلة تعلقها.. كتحط راسك تشوف العالم شنو فيه, كتفكر فالروتين وفحياتك لمنحاصرة فدائرة مغلقة.. عندك أحلام بزاف و طموح كبير, بغيتي توصل لواحد المكان فواحد الطبقة فالمجتمع.. ثورة ديال الأفكار كدور فراسك, منها أفكار ومخططات جهنمية.. لكن نتا ماشي ديال داكشي.. حيت ماشي لخاطرك..وعارف بلادك والقانون باش كتعامل الموظفيين.. عارف راسك غادي الحبس وخا نتا عايش فيه مع شوية ديال الحرية, كتفكر فتغير الحالة ولكن, عليك ديون خاصك تخلصها.. كتفكر فالمكرفطيين صحابك.. كتبتاسم, حيث ماشي وحيد..كلشي غرق.. كيتسدو عينيك.. كتفيق مع العاشرة ليلا لبلاصتك حيت منسيتيش خاصك دير التيلفون مع السادسة صباحا, ونسيتي ماغسلتيش رجليك.
إلياس
دوليبران - تخربيقولوجيا
ليست هناك تعليقات:
إرسال تعليق