مسرحية الإنتخابات ... إنتاج بورجوازي وتمثيل مرقاوي

بعدمّا سالات الحملة ديال التسجيل فالإنتخابات، بغيت نعطي الرأي ديالي، وكنسطّر على الرأي ديالي، ماسوقيش فحتى مخلوق اللي بغا يصوت إيصوت والليما بغاش هو حر فراسو.

نبداو بأكبر حملة دّارت لتشجيع المغاربة على التسجيل فالإنتخابات وهي ديك الأغنية الإستمراقية اللّي نتجاتها هيت راديو واللّي عامرا هي بالنّاس شبعانين لعاقا اللّي ماعمرهوم شافو الحكرة وباش إستغلو ولاد الشعب جابو روابّا معروفين بحال مسلم، ديزي ضروس، شايفين ... الهدف ديالهوم كان باين وهو استهداف عدد أكبر من الشباب للمشاركة فهاد المسرحية، ماغاديش ناقش الكلمات ديال الأغنية لأنه فات دارها الزنيبر، الفيديو أتلقاوه فالتحت، اللّي بغيت نعرف أنا واش  المغاربة 60 عام هادي وهوما كايصوتّو آشنو تبدل ؟ والو، واحتمال أنّ كاع الليّ شاركو فهاد الحملة ماغايكونش سبق ليهوم صوتو فحياتهوم، حيت الليّ كانعرف على الروّابا ديك النزعة الثورية اللّي ديما كاتبغي التغيير، ولكن فهاد الكوبلي كولهوم قلبو الفيستا خصوصا مسلم اللّي عندو تجربة كبيرة زعما فالراب، واللّي شخصيا كان كايعجبني داكشي اللّي كايدير، قبل مايشارك فهاد الحموضة، نعطيكوم مثال بسيط ، قبل خمس شهور خرّج الأغنية ديالو اللّي سميتها الرّسالة واللّي جا فواحد المقطع ديالها " تبدّل الدستور وتبدلات الحكومة وأنا باقي كيمّا كنت والدراري باقيين هوما هوما" ودابا جاي كايقول " صوت باش إعرفوك كاين ماشي مقموع" أشنو زعما التصويت هو الوسيلة الوحيدة باش غانبين راسي، وإلى مشيت صوّت أنولّي سبع،  أباراكا من هاد القوالب !!

دابا ندوزو للناس لّي كايكولو شارك ولوح الورقة خاوية، أولّى الفئة الأخرى اللّي كاتعمّر الورقة دالتصويت بالسبّان وتخصار الهضرة، علاش أصاحبي، راك غي كاتعاونهوم فالنجاح ديال المسرحية، حيت هوما كاتهمهوم غي النسبة دالمشاركة باش إبينو العالم باللّي المغرب دولة ديموقراطية وداكشي، والأصوات الفارغة اللّاغية ماكيتصوقوش ليها ، وإيلا بغيتي تعبر على الرأي ديالك بصّح حيت أصلا الإنتخابات مجرد تعبير عن رأي وصافي حيت إلى كنتي كاتنتاظر من التصويت ديالك إغير الناس اللّي فالسلطة راك غي كاتحلم، عطا الله وسائل التعبير باش تعبر على الرأي ديالك وباش تغير وماتبقاش عاطيها غي الكريتيك وصافي .ومن وجهة النظر ديالي ماتمشيش تصوّت أتكون أحسن وسيلة باش تعبر على الرّأي ديالك لأنه ملّي أيلقاو بلّي كاينا نسبة كبيرة مامشات تصوّت غايعرفو بلّي الشعب عاق وفاق ويبدلو علينا هاد السياسة الخاوية.#  وشوكران