افتتاح الموقع

السلام عليكم،

مرحبا بكم في موقع وشوكران، هاد السِّيت الجديد اللي السمية ديالو مقتبسة من السلسلة اللي كايدير شيخنا النورس، واللي حتَّا هو غايمشي فنفس الفكرة ديال توعية الشباب ومحاولة النهوض بالويب المغربي اللي وصلات لبباه الجدر، ونحاولو نتفارقو مع السِّيستيم ديال شوف وسكت، ونتاقلو لمرحلة حلل وناقش وغير. 

وشوكران ما غايكونش موقع خاص بالكُتَّابْ ديولو فقط، بل غايكون ساحة ديال للنقاش لبزاف ديال التصورات و التوجهات المختلفة، اللي نتوما كاتآمنو بها، داكشي علاش ماغاديش نكونو متعصبين لحتى جهة كلها يناقش ويدافع على الرأي ديالو بكل حرية، ومنها نيت نستافدو ونطورو المهارات ديالنا فالنقد والتحليل، عوض ماتغلب علينا سياسة القطيع ونبقاو نتسناو فئات معينة اللي تفرض علينا الرأي ديالها.

كما أن الموقع أيضا غايهتم بالمبدعين 'ديال بصح' اللي جا الوقت باش إِبانو ويزيدو إتعرفو كثر وكثر، ومنها نيت غايحبسو علينا هاد الحموضة والتفاهات باش عامر الويب المغربي دابا.

المهم الموقع غايكون مفتوح للجميع اللي عندو فكرة و بغا يناقشها فأي دومين كيخصنا كمغاربة فمرحبا به.

#وشوكران