عيب وعار : البنوك المغربية كتوقف التعامل مع البايبال

واش الناس كيزيدو القدام أعيباد الله وحنا ديما اللور اللور، آش هاد القرارات دالخر**، كاليك أسيدي البنكات د المغرب أيحبسو التعامل مع شركة البيبال العالمية، بغيتو تقطعو علينا الماء و الضوء زعما .. ما بغيتوناش نسترزقو الله !! واش عرفتو شحال د المبرمجين والمصممين اللي المصدر رزقهم الوحيد  هو الإبداعات ديولهوم اللي كيبيعوها فالأنترنت، آش غايديرو دابا صافي إيوليو مشومرين ، بعدمّا ما لقاوش مساكن خديمة كاتناسب المؤهلات ديولهوم فزمن المحسوبية والزبزنية وبّاك صاحبي.

وبحال هاد القرارت اللي كيحطمو الشباب ما غايكون من موراهوم غي أشخاص متخلفين فمناصب حساسة كايّاخدو قرارات متخلفة بحالهوم، باش إيوقفو حركة البلاد و يقطعو الرزق على آلاف الشباب، ، واش دابا الدول فالعالم كلو كاتشجع الشعوب ديالها باش إستافدو ما أمكن من الأنترنيت ، وهادو كيكسرونا بحال هاكّا ، و حيت مشا البايبال دابا أنا متأكد غايتبعوه شحال ديال الشركات الأخرى اللي ما غاتبقاش دايرة الثقة فالمغرب، وأصلا الأغلبية د المواقع د الشراء بداو كايسدو على المغاربة.

علاش ديما كاتكرهونا فهاد البلاد، راه الكافاءات موجودة فالمغرب ولكن المشكل فالمسؤولين اللي كيحطمو بنادم، دابا داخلنا عليكم بالله واش هاد الشباب كولّو أيضربو تران حشومة هادشي ، فراسكوم بعْدَا واش الشباب العامل فالأنترنت كايدخل العملة الصعبة كثر من الناس اللي ساكنين فالمهجر، أودّي ...

دابا الحل اللي بقّا هو نحولو الوِجهَة للبنوك د الخارج قْبْل حتى هي ماتقلب علينا وجهها، حيت أصلا البنوك المغربية ها الزوّاق والإشهارات الخاوية والمشكل الحماية فيها زيرو . ونتمنّا نسمعو عمّا قريب شي خبيرات على الإختراقات باش نردّو ليهوم شويا من هاد القرارات الخاوية باش كايخرجو.

وفالأخير كانتمنا من الشباب المبدع ما يهرسوش هاد الخبر  ويكمل فالأعمال الحرة والإستثمارات ديولو حيت لابدّا مانلقاو البديل إنشاء الله في انتظار الهربة من هاد البلاد .